د لوړو زده کړو وزارت مالي او اداري معین د ترکیې هېواد له سفیر سره د یوې ناستې په ترڅ کې وکتل
په پیل کې د لوړو زده کړو وزارت مالي او اداري معین الحاج مولوي حافظ محمد حامد حسیب د ترکیې هېواد سفیر او ورسره مل پلاوي ته د ښه راغلاست ویلو ترڅنګ له افغانستان سره د دغه هېواد له دوامداره همکاریو او ښو اړیکو څخه خوښي وښوده.
وروسته یې د نسايي ولادي روغتون د جوړولو او ترمیم په اړه هغه تفاهم لیک ته اشاره وکړه، چې مخکې لاسلیک شوی و او دغه راز یې د تدریسي روغتونونو علي آباد، شهر آرا او د هېواد د نورو تدریسي روغتونونو په بېلابېلو څانګو کې شته ستونزې یادې کړې او په دې برخه کې یې د پاملرنې او همکارۍ غوښتنه وکړه.
د ترکیې سفیر جهاد آرکین آی د لوړو زده کړو وزارت په بېلابېلو تحصیلي څانګو په ځانګړې توګه روغتیا په برخه کې د لوړو زده کړو وزارت د رهبرۍ له نیکو احساساتو او نظریاتو څخه قدرداني وکړه او ویې ویل چې ترکیه او افغانستان دوه دوست هیوادونه دي، چې یو له بل سره فرهنګي او په بېلابېلو برخو کې ګډې اړیکې لري.
نوموړي له افغانستان سره د ښو اړيکو، لا زياتو مرستو او همکاريو پر دوام ټينګار وکړ او د تدريسي روغتونونو په ځانګړي ډول د نسايي ولادي روغتون د ستونزو په حل کې يې د لازمو همکاريو ژمنه وکړه.
د کتنې پر دوام د علي آباد تدریسي روغتون رئیس ډاکټر عبدالمطلب شینواري دغه روغتون سره د ترکیې هېواد د دوامداره همکاریو په اړه معلومات ورکړل
